Dar mujhe bhi lagta hai kam-nazar zamane se

Dar mujhe bhī lagtā hai kam-nazar zamāne se

kyā karūñ na maane jab dil mirā manāne se

jal uThā thā pal bhar ko aap kī ināyat se

bujh gayā charāġh-e-dil aap ke bujhāne se

vo to lā-ubālī hai kyā use ḳhabar hogī

ham pe kyā guzartī hai hāl-e-dil chhupāne se

barhamī meñ chehre ko kyuuñ bigāḌ rakkhā hai

ye hasīn lagtā hai sirf muskurāne se

bām-o-dar mire ghar ke muntazir haiñ us din ke

jab tumheñ mile fursat mahfiloñ meñ jaane se

ham vafā ke matvāle jaan ko nahīñ Darte

baaz ab to aa jaao ham ko āzmāne se

dars jāñ-nisārī kā tū hameñ na de 'tashna'

kyā milā tujhe ab tak zindagī luTāne se

Dar mujhe bhi lagta hai kam-nazar zamane se

kya karun na mane jab dil mera manane se

jal uTha tha pal bhar ko aap ki inayat se

bujh gaya charagh-e-dil aap ke bujhane se

wo to la-ubaali hai kya use KHabar hogi

hum pe kya guzarti hai haal-e-dil chhupane se

barhami mein chehre ko kyun bigaD rakkha hai

ye hasin lagta hai sirf muskurane se

baam-o-dar mere ghar ke muntazir hain us din ke

jab tumhein mile fursat mahfilon mein jaane se

hum wafa ke matwale jaan ko nahin Darte

baz ab to aa jao hum ko aazmane se

dars jaan-nisari ka tu hamein na de 'tashna'

kya mila tujhe ab tak zindagi luTane se