Dar nahin mujhko gunahon ki giran-bari ka

Dar nahīñ mujh ko gunāhoñ kī girāñ-bārī kā

terī rahmat hai sabab merī subuksārī kā

daar ne ik sag-e-duniyā ko ye baḳhshā hai uruuj

hai farishtoñ meñ bhī charchā mirī dīñ-dārī kā

dil o jaañ sauñp chuke ham tujhe ai jān-e-jahāñ

ab hameñ ḳhauf hī kyā apnī giraftārī kā

jaan bhī chiiz hai koī ki rakheñ tum se dareġh

paas itnā bhī na ho rasm-e-vafādārī kā

sāqiyā sab ko tirī ek nazar kaafī thī

thā kise hosh tire ahd meñ hushyārī kā

maiñ fidā aaj bhī ho jaa.e vahī ek nigāh

ḳhātma ho kahīñ is daur kī ḳhuddārī kā

āshiqoñ ke liye hai daar hī dāru-e-shifā

ishq kī tib meñ davā naam hai bīmārī kā

ajal istāda hai bālīñ pe marīz-e-ġham-e-ishq

aañkh to khol zarā vaqt hai bedārī kā

'jauhar' aur hājib o darbāñ kī ḳhushāmad kyā ḳhuub

arsh o kursī pe guzar hai tire darbārī kā

Dar nahin mujh ko gunahon ki giran-bari ka

teri rahmat hai sabab meri subuksari ka

dar ne ek sag-e-duniya ko ye baKHsha hai uruj

hai farishton mein bhi charcha meri din-dari ka

dil o jaan saunp chuke hum tujhe ai jaan-e-jahan

ab hamein KHauf hi kya apni giraftari ka

jaan bhi chiz hai koi ki rakhen tum se daregh

pas itna bhi na ho rasm-e-wafadari ka

saqiya sab ko teri ek nazar kafi thi

tha kise hosh tere ahd mein hushyari ka

main fida aaj bhi ho jae wahi ek nigah

KHatma ho kahin is daur ki KHuddari ka

aashiqon ke liye hai dar hi daru-e-shifa

ishq ki tib mein dawa nam hai bimari ka

ajal istada hai baalin pe mariz-e-gham-e-ishq

aankh to khol zara waqt hai bedari ka

'jauhar' aur hajib o darban ki KHushamad kya KHub

arsh o kursi pe guzar hai tere darbari ka