dar-o-diwar pe ye kaisi faza tari hai

dar-o-dīvār pe ye kaisī fazā taarī hai

dil dhaḌakne kī sadā jaise azā-dārī hai

kaise kaTtī hai tire hijr meñ mat pūchhā kar

saañs talvār hai talvār bhī do-dhārī hai

dard ho ashk hoñ yādeñ hoñ ki tanhā.ī ho

tujh se mansūb har ik chiiz mujhe pyārī hai

merā hālāt se samjhautā nahīñ ho paayā

jang jo jaarī thī mujh meñ vo abhī jaarī hai

dekhnā dekh ke chhūne kī tamanna karnā

kis qadar zauq-e-talab aap kā bāzārī hai

gin ke rakkhe haiñ tirī yaad ke motī dil meñ

dil se mahfūz bhalā kaun sī almārī hai

ye jo 'gulfām' tire baad jiye jaatī hai

duniyā-dārī hai banāvaT hai adākārī hai

dar-o-diwar pe ye kaisi faza tari hai

dil dhaDakne ki sada jaise aza-dari hai

kaise kaTti hai tere hijr mein mat puchha kar

sans talwar hai talwar bhi do-dhaari hai

dard ho ashk hon yaaden hon ki tanhai ho

tujh se mansub har ek chiz mujhe pyari hai

mera haalat se samjhauta nahin ho paya

jang jo jari thi mujh mein wo abhi jari hai

dekhna dekh ke chhune ki tamanna karna

kis qadar zauq-e-talab aap ka bazari hai

gin ke rakkhe hain teri yaad ke moti dil mein

dil se mahfuz bhala kaun si almari hai

ye jo 'gulfam' tere baad jiye jati hai

duniya-dari hai banawaT hai adakari hai