dar-parda-e-bahaar jo wo naghma-KHwan na ho

dar-parda-e-bahār jo vo naġhma-ḳhvāñ na ho

bulbul se naala gul se tabassum ayaañ na ho

ġhavvās-e-bahr-e-ishq na tūfān-e-ġham se Dar

ye bhī shanāvarī kā tirī imtihāñ na ho

nākāmī-e-ḳhirad se mujhe ab ye ḳhauf hai

sa.ī-e-junūñ bhī merī kahīñ rā.egāñ na ho

aisā koī maqām na ab tak milā jahāñ

merī jabīñ ho aur tirā āstāñ na ho

us be-nishāñ kā mil nahīñ saktā kabhī surāġh

jab tak koī talāsh meñ ḳhud be-nishāñ na ho

maiñ bhī miTā chukā huuñ rah-e-ishq meñ hayāt

merā hī ye ġhubār pas-e-kārvāñ na ho

'vahshī' tarīq-e-ishq meñ rusvā.iyāñ bhī haiñ

kitnā hī dard dil meñ ho lab par fuġhāñ na ho

dar-parda-e-bahaar jo wo naghma-KHwan na ho

bulbul se nala gul se tabassum ayan na ho

ghawwas-e-bahr-e-ishq na tufan-e-gham se Dar

ye bhi shanawari ka teri imtihan na ho

nakaami-e-KHirad se mujhe ab ye KHauf hai

sai-e-junun bhi meri kahin raegan na ho

aisa koi maqam na ab tak mila jahan

meri jabin ho aur tera aastan na ho

us be-nishan ka mil nahin sakta kabhi suragh

jab tak koi talash mein KHud be-nishan na ho

main bhi miTa chuka hun rah-e-ishq mein hayat

mera hi ye ghubar pas-e-karwan na ho

'wahshi' tariq-e-ishq mein ruswaiyan bhi hain

kitna hi dard dil mein ho lab par fughan na ho