dar pe rahe ye dida-e-giryan tamam-umr

dar pe rahe ye dīda-e-giryāñ tamām-umr

lekin bujhī na ātish-e-hijrāñ tamām-umr

Daalā hai us ko jazb-e-mohabbat ne chaah meñ

dekhā na jis ne thā kabhī zindāñ tamām-umr

vaaq.e meñ ye hai harf-e-shikāyat bhī kyā kaheñ

niklā na koī jo mirā armāñ tamām-umr

pāmāl ko bhī ham ne kiyā apnā ham-jalīs

chhānā kiyā maiñ ḳhāk-e-bayābāñ tamām-umr

rātoñ ko mere vāste uThtā hai baar baar

bhūlūñgā dard-e-dil kā na ehsāñ tamām-umr

kyā mujh ko apnī yaad se ḳhilqat ne kho diyā

samjhā kiyā maiñ aap ko insāñ tamām-umr

'ārif' likheñ haiñ is meñ mazāmīn-e-intishār

hovegā jam.a merā na dīvāñ tamām-umr

dar pe rahe ye dida-e-giryan tamam-umr

lekin bujhi na aatish-e-hijran tamam-umr

Dala hai us ko jazb-e-mohabbat ne chah mein

dekha na jis ne tha kabhi zindan tamam-umr

waqe mein ye hai harf-e-shikayat bhi kya kahen

nikla na koi jo mera arman tamam-umr

pamal ko bhi hum ne kiya apna ham-jalis

chhana kiya main KHak-e-bayaban tamam-umr

raaton ko mere waste uThta hai bar bar

bhulunga dard-e-dil ka na ehsan tamam-umr

kya mujh ko apni yaad se KHilqat ne kho diya

samjha kiya main aap ko insan tamam-umr

'arif' likhen hain is mein mazamin-e-intishaar

howega jama mera na diwan tamam-umr