dar tak ab chhoD diya ghar se nikal kar aana

dar tak ab chhoḌ diyā ghar se nikal kar aanā

yā vo rātoñ ko sadā bhes badal kar aanā

hamdamo ye koī ronā hai ki tūfān hai aah

dekhiyo chashm se dariyā kā ubal kar aanā

qasd jab jaane kā kartā huuñ maiñ us shoḳh ke paas

teġh-e-abrū ye kahe hai ki sambhal kar aanā

hāsil us kūche meñ jaane se hameñ hai aur kyā

ulTe ghar apne magar ḳhaak meñ ral kar aanā

vaañ se avval dil-e-be-tāb tū kab aatā hai

aur aanā bhī to sau jā pe machal kar aanā

hamdamo merī sifārish ko to jaate ho vale

kahīñ vaañ jā ke na kuchh aur ḳhalal kar aanā

Duube yuuñ bahr-e-mohabbat meñ ki ab jīte-jī

apnā dushvār hai uupar ko uchhal kar aanā

kū-e-qātil meñ dam-e-naz.a koī le jaao

jā ke us jā hameñ uqda hai ye hal kar aanā

us kā be-vaj.h nahīñ hai ye chaman se bāhar

gul mire sāmne hāthoñ meñ masal kar aanā

bazm-e-ḳhūbāñ meñ agarche koī parchā.e hazār

par tire paas hameñ vaañ se bhī Tal kar aanā

jī chalā tan se mire jald ze-rāh-e-ashfāq

ghar se do chaar qadam aise meñ chal kar aanā

'jur.at' us kī kahūñ kyā tujh se tarah-dārī maiñ

jaanā jab uTh ke tab ik ruup badal kar aanā

dar tak ab chhoD diya ghar se nikal kar aana

ya wo raaton ko sada bhes badal kar aana

hamdamo ye koi rona hai ki tufan hai aah

dekhiyo chashm se dariya ka ubal kar aana

qasd jab jaane ka karta hun main us shoKH ke pas

tegh-e-abru ye kahe hai ki sambhal kar aana

hasil us kuche mein jaane se hamein hai aur kya

ulTe ghar apne magar KHak mein ral kar aana

wan se awwal dil-e-be-tab tu kab aata hai

aur aana bhi to sau ja pe machal kar aana

hamdamo meri sifarish ko to jate ho wale

kahin wan ja ke na kuchh aur KHalal kar aana

Dube yun bahr-e-mohabbat mein ki ab jite-ji

apna dushwar hai upar ko uchhal kar aana

ku-e-qatil mein dam-e-naza koi le jao

ja ke us ja hamein uqda hai ye hal kar aana

us ka be-wajh nahin hai ye chaman se bahar

gul mere samne hathon mein masal kar aana

bazm-e-KHuban mein agarche koi parchae hazar

par tere pas hamein wan se bhi Tal kar aana

ji chala tan se mere jald ze-rah-e-ashfaq

ghar se do chaar qadam aise mein chal kar aana

'jurat' us ki kahun kya tujh se tarah-dari main

jaana jab uTh ke tab ek rup badal kar aana