Dar ye hai bazuon mein mom ki surat na pighal jae kahin

Dar ye hai bāzuoñ meñ mom kī sūrat na pighal jaa.e kahīñ

tū mire saath mire jism ke dozaḳh meñ na jal jaa.e kahīñ

ghar se gaatā huā niklā to huuñ maiñ naġhma-e-ehsās magar

shahr ke shor meñ dab jaa.eñ na sar lai na badal jaa.e kahīñ

faqat is ḳhauf se jaatā nahīñ maiñ sub.h-e-tarab kī jānib

ufuq-e-dil se tire dard kā mahtāb na Dhal jaa.e kahīñ

ye tirā kaam nahīñ dekh na duniyā kī taraf gaa.e jā

maddham ik aah meñ ik chīḳh meñ pancham na badal jaa.e kahīñ

sub.h nazdīk hai karvaT bhī badal soch samajh kar 'ḳhālid'

zehn par āḳhir-e-shab niind kī talvār na chal jaa.e kahīñ

Dar ye hai bazuon mein mom ki surat na pighal jae kahin

tu mere sath mere jism ke dozaKH mein na jal jae kahin

ghar se gata hua nikla to hun main naghma-e-ehsas magar

shahr ke shor mein dab jaen na sar lai na badal jae kahin

faqat is KHauf se jata nahin main subh-e-tarab ki jaanib

ufuq-e-dil se tere dard ka mahtab na Dhal jae kahin

ye tera kaam nahin dekh na duniya ki taraf gae ja

maddham ek aah mein ek chiKH mein pancham na badal jae kahin

subh nazdik hai karwaT bhi badal soch samajh kar 'KHalid'

zehn par aaKHir-e-shab nind ki talwar na chal jae kahin