dara dara ke mere sare Dar nikalta hai

darā darā ke mire saare Dar nikāltā hai

'ajab ‘ilāj mirā chārāgar nikāltā hai

adhūre-pan kī mukammal dalīl huuñ lekin

kasar nikālne vaalā kasar nikāltā hai

tirā ḳhudā bhī ho tujh jaisā aur de tujh ko

daraḳht aisā jo gin kar samar nikāltā hai

saroñ pe haath zehānat baḌhā nahīñ saktā

ye aur baat ki andar kā Dar nikāltā hai

kisī kī yaad bhī ab tā-sahar nahīñ rahtī

ḳhayāl hai ki pahar-do-pahar nikāltā hai

fazā koī bhī ho fitrat badal nahīñ saktī

qafas meñ qaid parinda bhī par nikāltā hai

vo ġhair mausamī barsāt yaad hai tum ko

aur ek shaḳhs jo khiḌkī se sar nikāltā hai

'amit' vo kār-e-siyāsat ke mas.ale ye hujūm

jo hal nikāl na paa.e ḳhabar nikāltā hai

dara dara ke mere sare Dar nikalta hai

'ajab ‘ilaj mera chaaragar nikalta hai

adhure-pan ki mukammal dalil hun lekin

kasar nikalne wala kasar nikalta hai

tera KHuda bhi ho tujh jaisa aur de tujh ko

daraKHt aisa jo gin kar samar nikalta hai

saron pe hath zehanat baDha nahin sakta

ye aur baat ki andar ka Dar nikalta hai

kisi ki yaad bhi ab ta-sahar nahin rahti

KHayal hai ki pahar-do-pahar nikalta hai

faza koi bhi ho fitrat badal nahin sakti

qafas mein qaid parinda bhi par nikalta hai

wo ghair mausami barsat yaad hai tum ko

aur ek shaKHs jo khiDki se sar nikalta hai

'amit' wo kar-e-siyasat ke masale ye hujum

jo hal nikal na pae KHabar nikalta hai