Dara raha hai mujhe ek Dar andhere mein

Darā rahā hai mujhe ek Dar añdhere meñ

bichhaḌ na jaa.e kahīñ ham-safar añdhere meñ

umaDtī kaalī ghaTāoñ ko roknā hogā

na Duub jaa.e kahīñ dopahar añdhere meñ

karo na mere liye tum koī diyā raushan

mujhe ab aane lagā hai nazar añdhere meñ

ka.ī charāġhoñ ne ūdham machā.ī thī ik shab

tabhī se Duub gayā ghar kā ghar añdhere meñ

vo apnī zaat meñ ik chāñd hai pa vaqt-e-sahar

maiñ apnī zaat meñ jugnū huuñ par añdhere meñ

har aadmī nikal aatā hai ḳhol se bāhar

koī bhī rahtā nahīñ mo'atabar añdhere meñ

charāġh vāloñ ke sab da.ave khokhle nikle

maiñ kar rahā huuñ musalsal safar añdhere meñ

'kamāl' Daal do tum kūḌe-dān meñ un ko

charāġh jalte nahīñ haiñ agar añdhere meñ

Dara raha hai mujhe ek Dar andhere mein

bichhaD na jae kahin ham-safar andhere mein

umaDti kali ghaTaon ko rokna hoga

na Dub jae kahin dopahar andhere mein

karo na mere liye tum koi diya raushan

mujhe ab aane laga hai nazar andhere mein

kai charaghon ne udham machai thi ek shab

tabhi se Dub gaya ghar ka ghar andhere mein

wo apni zat mein ek chand hai pa waqt-e-sahar

main apni zat mein jugnu hun par andhere mein

har aadmi nikal aata hai KHol se bahar

koi bhi rahta nahin mo'atabar andhere mein

charagh walon ke sab dawe khokhle nikle

main kar raha hun musalsal safar andhere mein

'kamal' Dal do tum kuDe-dan mein un ko

charagh jalte nahin hain agar andhere mein