Dara raha hai musalsal yahi sawal mujhe

Darā rahā hai musalsal yahī savāl mujhe

guzār deñge yūñhī kyā ye māh-o-sāl mujhe

bichhaḌte vaqt izāfa na apne ranj meñ kar

yahī samajh ki huā hai bahut malāl mujhe

vo shahr-e-hijr 'ajab shahr-e-pur-tahayyur thā

bahut dinoñ meñ to aayā tirā ḳhayāl mujhe

maiñ is ḳhayāl se jaatā nahīñ 'urūj kī samt

mabād gher le tanhā kahīñ zavāl mujhe

har ek shaḳhs kā chehra ḳhud us kā chehra hai

kahīñ to koī mile ā.ina-misāl mujhe

tū mere ḳhvāb ko 'ujlat meñ rā.egāñ na samajh

abhī suḳhan ki imkāñ se mat nikāl mujhe

kise ḳhabar ki tā-ḳhāk aag zinda ho

zarā sī der Thahar aur dekh-bhāl mujhe

kahāñ kā vasl ki is shahr-e-pur-fishār meñ ab

tirā firāq bhī lagne lagā muhāl mujhe

usī ke dam se to qaa.em abhī hai tār-e-nafas

ye ik umiid ki rakhtī hai pur savāl mujhe

kahūñ maiñ taaza ġhazal ai havā-e-tāza-dilī

zarā sī der ko rakhe jo tū bahāl mujhe

ḳhirām-e-umar kisī shahr-e-pur-malāl ko chal

kiye hue hai ye āsūdgī niDhāl mujhe

kahāñ se laa.eñ bhalā ham javāz-e-ham-safarī

tujhe 'azīz tire ḳhvāb merā haal mujhe

mujhe kahāñ ye ḳhabar hai maiñ kyā huuñ kaisā huuñ

magar hai vaj.h-e-tasallī tirā jamāl mujhe

ubhar rahā huuñ maiñ sat.h-e-adam se naqsh-ba-naqsh

tirī hī jalvagarī huuñ zarā ujaal mujhe

yahāñ to habs bahut hai so gard-bād-e-junūñ

madār-e-vaqt se bāhar kahīñ uchhāl mujhe

phir us ke baa'd na tū hai na ye charāġh na maiñ

sahar kī pahlī kiran tak zarā sañbhāl mujhe

Dara raha hai musalsal yahi sawal mujhe

guzar denge yunhi kya ye mah-o-sal mujhe

bichhaDte waqt izafa na apne ranj mein kar

yahi samajh ki hua hai bahut malal mujhe

wo shahr-e-hijr 'ajab shahr-e-pur-tahayyur tha

bahut dinon mein to aaya tera KHayal mujhe

main is KHayal se jata nahin 'uruj ki samt

mabaad gher le tanha kahin zawal mujhe

har ek shaKHs ka chehra KHud us ka chehra hai

kahin to koi mile aaina-misal mujhe

tu mere KHwab ko 'ujlat mein raegan na samajh

abhi suKHan ki imkan se mat nikal mujhe

kise KHabar ki ta-KHak aag zinda ho

zara si der Thahar aur dekh-bhaal mujhe

kahan ka wasl ki is shahr-e-pur-fishaar mein ab

tera firaq bhi lagne laga muhaal mujhe

usi ke dam se to qaem abhi hai tar-e-nafas

ye ek umid ki rakhti hai pur sawal mujhe

kahun main taza ghazal ai hawa-e-taza-dili

zara si der ko rakhe jo tu bahaal mujhe

KHiram-e-umar kisi shahr-e-pur-malal ko chal

kiye hue hai ye aasudgi niDhaal mujhe

kahan se laen bhala hum jawaz-e-ham-safari

tujhe 'aziz tere KHwab mera haal mujhe

mujhe kahan ye KHabar hai main kya hun kaisa hun

magar hai wajh-e-tasalli tera jamal mujhe

ubhar raha hun main sath-e-adam se naqsh-ba-naqsh

teri hi jalwagari hun zara ujal mujhe

yahan to habs bahut hai so gard-baad-e-junun

madar-e-waqt se bahar kahin uchhaal mujhe

phir us ke ba'd na tu hai na ye charagh na main

sahar ki pahli kiran tak zara sanbhaal mujhe