daraaz-qamat daraaz-gesu ajib sa ek nigar tha wo

darāz-qāmat darāz-gesū ajiib sā ik nigār thā vo

guloñ kī baag us ke haath meñ thī havāoñ par jab savār thā vo

junūñ thā ban kar lahū ragoñ meñ ki raat din dauḌte the lamhe

thake na the vo jo ruk ga.e the mire liye be-qarār thā vo

mire ḳhudā husn ke dafīne ko mat ḳhazāne kā martaba de

ki pā ke jo us ko ḳhush bahut thā gañvā ke kal ashk-bār thā vo

ubal paḌe nafratoñ ke sote ki ho ga.ī ḳhushk jhiil ġham kī

shikast-ḳhurda sā muñh chhupā.e na jaane kis kā shikār thā vo

kabhī kabhī jo sunā gayā thā kahīñ kahīñ jo paḌhā gayā thā

kitāb meñ band ho chukā hai ik umr kā shāhkār thā vo

vo dostoñ dushmanoñ kā pyārā phirā tamām umr maarā maarā

sunā hai kal ġham ne maar Daalā ki jis kā derīna yaar thā vo

ajiib raahī thā reg-zāroñ meñ pyaas lamhoñ kī bo rahā thā

magar chaTTānoñ se gir rahā thā ki shab meñ ik ābshār thā vo

daraaz-qamat daraaz-gesu ajib sa ek nigar tha wo

gulon ki bag us ke hath mein thi hawaon par jab sawar tha wo

junun tha ban kar lahu ragon mein ki raat din dauDte the lamhe

thake na the wo jo ruk gae the mere liye be-qarar tha wo

mere KHuda husn ke dafine ko mat KHazane ka martaba de

ki pa ke jo us ko KHush bahut tha ganwa ke kal ashk-bar tha wo

ubal paDe nafraton ke sote ki ho gai KHushk jhil gham ki

shikast-KHurda sa munh chhupae na jaane kis ka shikar tha wo

kabhi kabhi jo suna gaya tha kahin kahin jo paDha gaya tha

kitab mein band ho chuka hai ek umr ka shahkar tha wo

wo doston dushmanon ka pyara phira tamam umr mara mara

suna hai kal gham ne mar Dala ki jis ka derina yar tha wo

ajib rahi tha reg-zaron mein pyas lamhon ki bo raha tha

magar chaTTanon se gir raha tha ki shab mein ek aabshaar tha wo