daraaz-qamti tera hunar gaya aaKHir

darāz-qāmtī terā hunar gayā āḳhir

jo qad ko maiñ ne baḌhāyā to sar gayā āḳhir

vo jang jiit ke lauTā to log pūchhte the

lahū uchhālne vaalā kidhar gayā āḳhir

karegā kaun ta'āqub udaas lamhoñ kā

ki jo 'alīl thā mujh meñ vo mar gayā āḳhir

jo ek lafz taḌaptā thā mere hoñToñ par

vo karb ban ke lahū meñ utar gayā āḳhir

tilism toḌ ke ehsās-o-fikr-o-ḳhvāhish kā

ye kaun ruuh ko bedār kar gayā āḳhir

mujhe junūn thā tāroñ ko toḌ laane kā

magar maiñ ḳhud hī ḳhalā meñ bikhar gayā āḳhir

tamām 'umr ke dukh-sukh ko baañT kar ai 'rind'

mirā ġhanīm mire saath mar gayā āḳhir

daraaz-qamti tera hunar gaya aaKHir

jo qad ko main ne baDhaya to sar gaya aaKHir

wo jang jit ke lauTa to log puchhte the

lahu uchhaalne wala kidhar gaya aaKHir

karega kaun ta'aqub udas lamhon ka

ki jo 'alil tha mujh mein wo mar gaya aaKHir

jo ek lafz taDapta tha mere honTon par

wo karb ban ke lahu mein utar gaya aaKHir

tilism toD ke ehsas-o-fikr-o-KHwahish ka

ye kaun ruh ko bedar kar gaya aaKHir

mujhe junun tha taron ko toD lane ka

magar main KHud hi KHala mein bikhar gaya aaKHir

tamam 'umr ke dukh-sukh ko banT kar ai 'rind'

mera ghanim mere sath mar gaya aaKHir