dard apna main isi taur jata rahta hun

dard apnā maiñ isī taur jatā rahtā huuñ

hasb-e-hāl us ko ka.ī sher sunā rahtā huuñ

ik hī jā rahne kā hai ghar pa usī ghar meñ aah

dil ye rahtā hai judā aur maiñ judā rahtā huuñ

baat meñ kis kī sunūñ aah ki ai murġh-e-chaman

shor meñ apne hī nāloñ ke sadā rahtā huuñ

baare itnā hai asar dard ke afsāne meñ

ek do shaḳhs ko har roz rulā rahtā huuñ

bazm-e-ḳhūbāñ meñ ye sar go kaTe rone pe mirā

sham.a-sāñ ashk par āñkhoñ se bahā rahtā huuñ

āh-o-nāla meñ agar kuchh bhī asar hai mere

to maiñ us shoḳh ko ik roz bulā rahtā huuñ

husn aur ishq kā kyā zikr karūñ mat pūchho

in dinoñ ziist se bhī apnī ḳhafā rahtā huuñ

dil lagā jab se mirā aah tabhī se 'jur.at'

kitnī hī āfateñ har roz uThā rahtā huuñ

dard apna main isi taur jata rahta hun

hasb-e-haal us ko kai sher suna rahta hun

ek hi ja rahne ka hai ghar pa usi ghar mein aah

dil ye rahta hai juda aur main juda rahta hun

baat mein kis ki sunun aah ki ai murgh-e-chaman

shor mein apne hi nalon ke sada rahta hun

bare itna hai asar dard ke afsane mein

ek do shaKHs ko har roz rula rahta hun

bazm-e-KHuban mein ye sar go kaTe rone pe mera

shama-san ashk par aankhon se baha rahta hun

aah-o-nala mein agar kuchh bhi asar hai mere

to main us shoKH ko ek roz bula rahta hun

husn aur ishq ka kya zikr karun mat puchho

in dinon zist se bhi apni KHafa rahta hun

dil laga jab se mera aah tabhi se 'jurat'

kitni hi aafaten har roz uTha rahta hun