درد بڑھتے بڑھتے آپ اپنا مداوا ہو گیا

درد بڑھتے بڑھتے آپ اپنا مداوا ہو گیا

آنکھ سے آنسو بہے تو جی بھی ہلکا ہو گیا

ان سے قاصد صرف یہ کہنا بصد عجز و نیاز

درد جو جاں بخش تھا اب جان لیوا ہو گیا

میں نے خود سے بھی چھپایا تھا تری الفت کا راز

اے نگاہ ناز تجھ پر کیسے افشا ہو گیا

اپنے بیمار محبت کا کرو تم کچھ علاج

ورنہ پھر کہتے پھرو گے ہائے یہ کیا ہو گیا

بزم میں اخترؔ مجھی پر تو نہ تھی ان کی نگاہ

میں نے ان آنکھوں میں کیا دیکھا مجھے کیا ہو گیا