dard ban ke kabhi gham ban ke satata hi raha

dard ban ke kabhī ġham ban ke satātā hī rahā

apne hone kā vo ehsās dilātā hī rahā

vo ḳharīdār to muddat huī aatā hī rahā

maiñ dukāñ hīroñ kī palkoñ pe sajātā hī rahā

haa.e vo us ke judā hone kā manzar yārab

vo chalā bhī gayā maiñ haath hilātā hī rahā

gahrī tārīkī thī sannāTā thā par ik jugnū

raushnī kā mujhe ehsās dilātā hī rahā

har nayā daur na.e le ke charāġh aayā kiyā

ik añdherā sā magar ziist pe chhātā hī rahā

merī bezār tabī.at ko sukūñ mil na sakā

yuuñ to har roz tirī bazm meñ jaatā hī rahā

na samajh paayā ye insān mazāhib ke husūl

ghar yahāñ bhaa.ī kā ḳhud bhaa.ī jalātā hī rahā

ab ke bādal ko ḳhudā jaane huā kyā aisā

jab bhī barsā to harī fasl jalātā hī rahā

saarā din us ke tasavvur se huā kī bāteñ

ḳhvāb ban ke mirī rātoñ ko sajātā hī rahā

sher-o-fan us kā hai mamnūn dabī aahoñ meñ

apne ġham se mirī ġhazloñ ko sajātā hī rahā

vaqt ke saath badal jaatā maiñ lekin har pal

merā maazī mujhe ā.īna dikhātā hī rahā

ek ma.asūm sā pākīza sā jazba 'hairat'

jab bhī bahkā to mujhe raah pe laatā hī rahā

dard ban ke kabhi gham ban ke satata hi raha

apne hone ka wo ehsas dilata hi raha

wo KHaridar to muddat hui aata hi raha

main dukan hiron ki palkon pe sajata hi raha

hae wo us ke juda hone ka manzar yarab

wo chala bhi gaya main hath hilata hi raha

gahri tariki thi sannaTa tha par ek jugnu

raushni ka mujhe ehsas dilata hi raha

har naya daur nae le ke charagh aaya kiya

ek andhera sa magar zist pe chhata hi raha

meri bezar tabiat ko sukun mil na saka

yun to har roz teri bazm mein jata hi raha

na samajh paya ye insan mazahib ke husul

ghar yahan bhai ka KHud bhai jalata hi raha

ab ke baadal ko KHuda jaane hua kya aisa

jab bhi barsa to hari fasl jalata hi raha

sara din us ke tasawwur se hua ki baaten

KHwab ban ke meri raaton ko sajata hi raha

sher-o-fan us ka hai mamnun dabi aahon mein

apne gham se meri ghazlon ko sajata hi raha

waqt ke sath badal jata main lekin har pal

mera mazi mujhe aaina dikhata hi raha

ek masum sa pakiza sa jazba 'hairat'

jab bhi bahka to mujhe rah pe lata hi raha