dard dekhen na ab dawa dekhen

dard dekheñ na ab davā dekheñ

marne vāloñ kā hausla dekheñ

kuchh nahīñ ishq meñ ba.iid miyāñ

raushnī chhueñ aur havā dekheñ

jab na dekhā use to kyā dekhā

dekh kar us ko aur kyā dekheñ

jo na dekhā thā vo bhī dekh liyā

ab dikhātā hai kyā ḳhudā dekheñ

ham meñ koī mushābahat bhī hai

aa.iye mil ke aa.ina dekheñ

ye mohabbat to shai hī aisī hai

aap bhī apnā fā.eda dekheñ

maiñ palaT jā.ūñ apne ghar kī taraf

aap bhī apnā rāstā dekheñ

kyā khule un pe ishq jo 'saifī'

shahr se dasht ko judā dekheñ

dard dekhen na ab dawa dekhen

marne walon ka hausla dekhen

kuchh nahin ishq mein baid miyan

raushni chhuen aur hawa dekhen

jab na dekha use to kya dekha

dekh kar us ko aur kya dekhen

jo na dekha tha wo bhi dekh liya

ab dikhata hai kya KHuda dekhen

hum mein koi mushabahat bhi hai

aaiye mil ke aaina dekhen

ye mohabbat to shai hi aisi hai

aap bhi apna faeda dekhen

main palaT jaun apne ghar ki taraf

aap bhi apna rasta dekhen

kya khule un pe ishq jo 'saifi'

shahr se dasht ko juda dekhen