dard dil se nikal dun kaise

dard dil se nikāl duuñ kaise

bahte dariyā ko Taal duuñ kaise

dostoñ se fareb khaa.e haiñ

tum ko kis kī misāl duuñ kaise

be-zamīroñ ko chārāgar kah kar

apnī jaañ ko vabāl duuñ kaise

hākimoñ ko ḳhudā likhūñ ab maiñ

hukm-e-rab ko maiñ Taal duuñ kaise

mujh ko rab se milā.e rakhtā hai

hijr dil se nikāl duuñ kaise

maiñ huuñ 'irsa' faqīr-e-rāh-e-vafā

ḳhud ko koī jamāl duuñ kaise

dard dil se nikal dun kaise

bahte dariya ko Tal dun kaise

doston se fareb khae hain

tum ko kis ki misal dun kaise

be-zamiron ko chaaragar kah kar

apni jaan ko wabaal dun kaise

hakimon ko KHuda likhun ab main

hukm-e-rab ko main Tal dun kaise

mujh ko rab se milae rakhta hai

hijr dil se nikal dun kaise

main hun 'irsa' faqir-e-rah-e-wafa

KHud ko koi jamal dun kaise