dard-e-dil dard-e-jigar aaTh-pahar hota hai

dard-e-dil dard-e-jigar āTh-pahar hotā hai

kyā hī majbūr mohabbat meñ bashar hotā hai

bahs donoñ meñ shab-e-hijr paḌī hai dekhūñ

aah meñ yā mire naale meñ asar hotā hai

shab-e-furqat mujhe mar mar ke sahar hotī hai

shaam se haal mirā nau-e-digar hotā hai

vo chale ā.eñge ik roz kaleja thāme

ham dikhā deñge ki nāloñ meñ asar hotā hai

lab-e-rañgīñ kā ḳhayāl aatā hai jis dam dil ko

merī āñkhoñ se ravāñ ḳhūn-e-jigar hotā hai

rāt-din kyā ḳhalish-e-nashtar-e-ġham hai 'mas.ūd'

dard kyoñ dil meñ mire āTh-pahar hotā hai

dard-e-dil dard-e-jigar aaTh-pahar hota hai

kya hi majbur mohabbat mein bashar hota hai

bahs donon mein shab-e-hijr paDi hai dekhun

aah mein ya mere nale mein asar hota hai

shab-e-furqat mujhe mar mar ke sahar hoti hai

sham se haal mera nau-e-digar hota hai

wo chale aaenge ek roz kaleja thame

hum dikha denge ki nalon mein asar hota hai

lab-e-rangin ka KHayal aata hai jis dam dil ko

meri aankhon se rawan KHun-e-jigar hota hai

raat-din kya KHalish-e-nashtar-e-gham hai 'masud'

dard kyon dil mein mere aaTh-pahar hota hai