dard-e-dil hi mein nihan hai dard-e-dil ka raaz bhi

dard-e-dil hī meñ nihāñ hai dard-e-dil kā raaz bhī

saaz hī meñ mustatar hai saaz kī āvāz bhī

ho ga.iiñ raushan mirī āñkheñ zah-e-nūr-e-jamāl

dīdanī hai vo aur us ke husn kā e.ajāz bhī

allah allah vahdat-e-jazbāt-o-kaifiyyāt-e-ishq

ek sūrat meñ huā anjām bhī āġhāz bhī

arsa-e-hastī mujhe kyoñ arsa-e-mahshar na ho

fitna-parvarda bhī aur us kā ḳhirām-e-nāz bhī

ḳhud nigāh-e-shauq kar detī hai ifshā rāz-e-dil

ishq hai kambaḳht apnā aap hī ġhammāz bhī

sunñe vaale kā zarā husn-e-samā.at dekhiye

aa ga.ī pardoñ ke bāhar saaz kī āvāz bhī

kar chuke gor-e-ġharībāñ kī ziyārat kar chuke

dekh liije ab zarā qabr-e-shahīd-e-nāz bhī

ruuh nikle tan se naġhme kaif ke gaatī huī

maiñ dam-e-āḳhir agar sun luuñ tirī āvāz bhī

dīda-e-bedār 'kaukab' faizyāb-e-nūr hai

uTh ga.e ya.anī nigāhoñ se hijāb-e-rāz bhī

dard-e-dil hi mein nihan hai dard-e-dil ka raaz bhi

saz hi mein mustatar hai saz ki aawaz bhi

ho gain raushan meri aankhen zah-e-nur-e-jamal

didani hai wo aur us ke husn ka eajaz bhi

allah allah wahdat-e-jazbaat-o-kaifiyyat-e-ishq

ek surat mein hua anjam bhi aaghaz bhi

arsa-e-hasti mujhe kyon arsa-e-mahshar na ho

fitna-parwarda bhi aur us ka KHiram-e-naz bhi

KHud nigah-e-shauq kar deti hai ifsha raaz-e-dil

ishq hai kambaKHt apna aap hi ghammaz bhi

sunne wale ka zara husn-e-samaat dekhiye

aa gai pardon ke bahar saz ki aawaz bhi

kar chuke gor-e-ghariban ki ziyarat kar chuke

dekh lije ab zara qabr-e-shahid-e-naz bhi

ruh nikle tan se naghme kaif ke gati hui

main dam-e-aKHir agar sun lun teri aawaz bhi

dida-e-bedar 'kaukab' faizyab-e-nur hai

uTh gae yani nigahon se hijab-e-raaz bhi