dard-e-dil ke liye kuchh aisi dawa li humne

dard-e-dil ke liye kuchh aisī davā lī ham ne

Tiis gar kam bhī huī aur baḌhā lī ham ne

apne ashkoñ ko tabassum se chhupāyā jaise

jism uryāñ thā to pārīna qabā lī ham ne

umr-bhar shahr-e-nigārāñ meñ vafā ko tarse

apnī nā-karda gunāhī kī sazā lī ham ne

chīḳhte lamhoñ se andar kā na rishta TuuTā

varna bāhar kī to ḳhāmosh fazā lī ham ne

ek mahshar sā bapā thā ka.ī āvāzoñ kā

bolnā chāhā to māñge kī sadā lī ham ne

dard-e-dil ke liye kuchh aisi dawa li hum ne

Tis gar kam bhi hui aur baDha li hum ne

apne ashkon ko tabassum se chhupaya jaise

jism uryan tha to parina qaba li hum ne

umr-bhar shahr-e-nigaran mein wafa ko tarse

apni na-karda gunahi ki saza li hum ne

chiKHte lamhon se andar ka na rishta TuTa

warna bahar ki to KHamosh faza li hum ne

ek mahshar sa bapa tha kai aawazon ka

bolna chaha to mange ki sada li hum ne