dard-e-dil ke sath hai zaKHm-e-jigar kis se kahun

dard-e-dil ke saath hai zaḳhm-e-jigar kis se kahūñ

ban ga.ī hai āshiqī bhī dard-e-sar kis se kahūñ

mar rahā huuñ jā rahā huuñ maut kī āġhosh meñ

uf ḳhudā hotī nahīñ un ko ḳhabar kis se kahūñ

āshiyāñ ahbāb ne chhīnā kiyā be-ghar mujhe

haa.e phir kaaTe haiñ mere bāl-o-par kis se kahūñ

zaḳhm-e-dil meñ phuul haiñ go rang-o-nik.hat kuchh nahīñ

jaise hai jashn-e-charāġhāñ be-sharar kis se kahūñ

pā sukūñ tum ko 'irāqī' aarzū merī rahī

phir rahā huuñ kū-ba-kū maiñ dar-ba-dar kis se kahūñ

dard-e-dil ke sath hai zaKHm-e-jigar kis se kahun

ban gai hai aashiqi bhi dard-e-sar kis se kahun

mar raha hun ja raha hun maut ki aaghosh mein

uf KHuda hoti nahin un ko KHabar kis se kahun

aashiyan ahbab ne chhina kiya be-ghar mujhe

hae phir kaTe hain mere baal-o-par kis se kahun

zaKHm-e-dil mein phul hain go rang-o-nikhat kuchh nahin

jaise hai jashn-e-charaghan be-sharar kis se kahun

pa sukun tum ko 'iraqi' aarzu meri rahi

phir raha hun ku-ba-ku main dar-ba-dar kis se kahun