dard-e-dil ko dastan-dar-dastan hone to do

dard-e-dil ko dāstāñ-dar-dāstāñ hone to do

shahr-e-qātil meñ zarā amn-o-amāñ hone to do

merī āh-e-nīm-shab manzil-numā-e-shauq hai

nāla-e-dil ko rahīl-e-kārvāñ hone to do

aur bhī nā-qadr-dānī-e-hunar yaad aa.egī

ham-nashīnoñ ko malāl-e-raftagāñ hone to do

dil udhar maa.il huā hī thā ki vahshat baḌh ga.ī

us kī chāhat ko zarā ātish-ba-jāñ hone to do

ḳhāna-e-be-rañg bhī hai shīsha-e-sad-rañg bhī

dil ko pahle be-niyāz-e-īn-o-āñ hone to do

surḳhī-e-ḳhūn-e-tamannā ābrū-e-ishq hai

ārzūoñ kā lahū rañg-e-bayāñ hone to do

hai nihāñ mashq-e-suḳhan meñ fikr-o-fan auj-e-suḳhan

haañ zamīn-e-sher ko 'barq' āsmāñ hone to do

dard-e-dil ko dastan-dar-dastan hone to do

shahr-e-qatil mein zara amn-o-aman hone to do

meri aah-e-nim-shab manzil-numa-e-shauq hai

nala-e-dil ko rahil-e-karwan hone to do

aur bhi na-qadr-dani-e-hunar yaad aaegi

ham-nashinon ko malal-e-raftagan hone to do

dil udhar mail hua hi tha ki wahshat baDh gai

us ki chahat ko zara aatish-ba-jaan hone to do

KHana-e-be-rang bhi hai shisha-e-sad-rang bhi

dil ko pahle be-niyaz-e-in-o-an hone to do

surKHi-e-KHun-e-tamanna aabru-e-ishq hai

aarzuon ka lahu rang-e-bayan hone to do

hai nihan mashq-e-suKHan mein fikr-o-fan auj-e-suKHan

han zamin-e-sher ko 'barq' aasman hone to do