dard-e-dil paida karen ya dard-e-sar paida karen

dard-e-dil paidā kareñ yā dard-e-sar paidā kareñ

merī bāteñ jaane un par kyā asar paidā kareñ

zindagī un kī hai jo gulshan meñ apne vāste

āshiyāñ bā-vasf-e-sad-barq-o-sharar paidā kareñ

aa.iye ham rahbar-o-rahzan se ho kar be-niyāz

manzil-e-maqsūd tak ḳhud rahguzar paidā kareñ

aa ki phir de kar payām-e-nau mazāq-e-dīd ko

har nazar meñ ek duniyā-e-digar paidā kareñ

khul hī jā.egī haqīqat ālam-e-azdād kī

dīda-e-dil imtiyāz-e-ḳhair-o-shar paidā kareñ

un ko pā kar ḳhud ko kho denā to hai ik aam baat

un ko pā kar ḳhud ko paane kā hunar paidā kareñ

āh-e-be-tāsīr meñ 'tālib' asar aa jā.egā

dard-e-dil paidā kareñ dard-e-jigar paidā kareñ

dard-e-dil paida karen ya dard-e-sar paida karen

meri baaten jaane un par kya asar paida karen

zindagi un ki hai jo gulshan mein apne waste

aashiyan ba-wasf-e-sad-barq-o-sharar paida karen

aaiye hum rahbar-o-rahzan se ho kar be-niyaz

manzil-e-maqsud tak KHud rahguzar paida karen

aa ki phir de kar payam-e-nau mazaq-e-did ko

har nazar mein ek duniya-e-digar paida karen

khul hi jaegi haqiqat aalam-e-azdad ki

dida-e-dil imtiyaz-e-KHair-o-shar paida karen

un ko pa kar KHud ko kho dena to hai ek aam baat

un ko pa kar KHud ko pane ka hunar paida karen

aah-e-be-tasir mein 'talib' asar aa jaega

dard-e-dil paida karen dard-e-jigar paida karen