dard-e-firaq dard-e-tamanna liye hue

dard-e-firāq dard-e-tamannā liye hue

duniyā se jā rahā huuñ maiñ duniyā liye hue

huuñ dil meñ ek terī tamanna liye hue

yā huuñ tamām ishq kī duniyā liye hue

aksar uThā huuñ dost kī mahfil se is tarah

āñkhoñ meñ ashk ashkoñ meñ dariyā liye hue

duniyā meñ rah ke bhī hai vo duniyā se be-niyāz

jo hai tire ḳhayāl kī duniyā liye hue

shān-e-ḳhulūs-e-sajda ke qurbān jā.iye

uTThī jabīñ to naqsh-e-kaf-e-pā liye hue

miltā hai kyā javāb tirī bārgāh se

aaya huuñ lab pe harf-e-tamannā liye hue

sahrā meñ kaT rahī hai agar zindagī to kyā

āñkhoñ meñ hai bahār kā naqsha liye hue

un kā ilaaj kaun kare bas tire sivā

haiñ jitne zaḳhm dil meñ masīhā liye hue

ab jo bhī bazm-e-dost meñ pesh aa.e ai 'kamāl'

jaatā huuñ dil meñ dil kā taqāzā liye hue

dard-e-firaq dard-e-tamanna liye hue

duniya se ja raha hun main duniya liye hue

hun dil mein ek teri tamanna liye hue

ya hun tamam ishq ki duniya liye hue

aksar uTha hun dost ki mahfil se is tarah

aankhon mein ashk ashkon mein dariya liye hue

duniya mein rah ke bhi hai wo duniya se be-niyaz

jo hai tere KHayal ki duniya liye hue

shan-e-KHulus-e-sajda ke qurban jaiye

uTThi jabin to naqsh-e-kaf-e-pa liye hue

milta hai kya jawab teri bargah se

aaya hun lab pe harf-e-tamanna liye hue

sahra mein kaT rahi hai agar zindagi to kya

aankhon mein hai bahaar ka naqsha liye hue

un ka ilaj kaun kare bas tere siwa

hain jitne zaKHm dil mein masiha liye hue

ab jo bhi bazm-e-dost mein pesh aae ai 'kamal'

jata hun dil mein dil ka taqaza liye hue