dard-e-furqat ko kya kare koi

dard-e-furqat ko kyā kare koī

haa.e aadat ko kyā kare koī

dil kī hasrat ko kyā kare koī

is musībat ko kyā kare koī

pyaar karne se aar hai to kaho

achchhī sūrat ko kyā kare koī

dostoñ ko to rokūñ shoḳhī se

saarī ḳhilqat ko kyā kare koī

chashm-o-dil se chhupā.ūñ dard-e-nihāñ

rañg-e-sūrat ko kyā kare koī

apne dil kā to ḳhuun kar Dālūñ

un kī sūrat ko kyā kare koī

un kā farmān hai ki āh-o-fuġhāñ

mā-badaulat ko kyā kare koī

nāsehoñ ko salām bhī kar luuñ

us nasīhat ko kyā kare koī

aarzū hai to ḳhauf bhī kuchh hai

paak niyyat ko kyā kare koī

tujh meñ jo baat chāhiye vo nahīñ

le ke sūrat ko kyā kare koī

vo ḳhafā hoñ to maiñ ḳhatā kar luuñ

chheḌ hujjat ko kyā kare koī

mehrbāñ haiñ janāb-e-dil us par

aise hazrat ko kyā kare koī

merī taqrīr meñ to hai tāsīr

terī sohbat ko kyā kare koī

naam bhī un kā ham nahīñ lete

ab sharārat ko kyā kare koī

ai safī' vo bigaḌ ga.e man kar

terī qismat ko kyā kare koī

dard-e-furqat ko kya kare koi

hae aadat ko kya kare koi

dil ki hasrat ko kya kare koi

is musibat ko kya kare koi

pyar karne se aar hai to kaho

achchhi surat ko kya kare koi

doston ko to rokun shoKHi se

sari KHilqat ko kya kare koi

chashm-o-dil se chhupaun dard-e-nihan

rang-e-surat ko kya kare koi

apne dil ka to KHun kar Dalun

un ki surat ko kya kare koi

un ka farman hai ki aah-o-fughan

ma-badaulat ko kya kare koi

nasehon ko salam bhi kar lun

us nasihat ko kya kare koi

aarzu hai to KHauf bhi kuchh hai

pak niyyat ko kya kare koi

tujh mein jo baat chahiye wo nahin

le ke surat ko kya kare koi

wo KHafa hon to main KHata kar lun

chheD hujjat ko kya kare koi

mehrban hain janab-e-dil us par

aise hazrat ko kya kare koi

meri taqrir mein to hai tasir

teri sohbat ko kya kare koi

nam bhi un ka hum nahin lete

ab shararat ko kya kare koi

ai safi' wo bigaD gae man kar

teri qismat ko kya kare koi