درد فرقت سے جو بھی گھبرائے

درد فرقت سے جو بھی گھبرائے

عشق اس کو کبھی نہ راس آئے

بات ہی ہم نفس کچھ ایسی تھی

جا کے محفل سے ہم جو لوٹ آئے

اس نشیمن کی شان کیا ہوگی

برق رہ رہ کے جس پہ لہرائے

روشنی کا نشاں نہیں ملتا

ہر طرف ظلمتوں کے ہیں سائے

تیرا در چھوڑ کر اے جان وفا

کوئی جائے تو پھر کہاں جائے

یا خدا عمر ہو دراز اس کی

دشمنی کی جو آگ بھڑکائے

خواب میں ان کے آستانے پر

سجدۂ شوق ہم گزار آئے

جانے کیا ہو گیا مجھے انجمؔ

آنکھ بھر آئی جب وہ یاد آئے