dard-e-furqat se jo bhi ghabrae

dard-e-furqat se jo bhī ghabrā.e

ishq us ko kabhī na raas aa.e

baat hī ham-nafas kuchh aisī thī

jā ke mahfil se ham jo lauT aa.e

us nasheman kī shaan kyā hogī

barq rah rah ke jis pe lahrā.e

raushnī kā nishāñ nahīñ miltā

har taraf zulmatoñ ke haiñ saa.e

terā dar chhoḌ kar ai jān-e-vafā

koī jaa.e to phir kahāñ jaa.e

yā-ḳhudā umr ho darāz us kī

dushmanī kī jo aag bhaḌkā.e

ḳhvāb meñ un ke āstāne par

sajda-e-shauq ham guzār aa.e

jaane kyā ho gayā mujhe 'anjum'

aañkh bhar aa.ī jab vo yaad aa.e

dard-e-furqat se jo bhi ghabrae

ishq us ko kabhi na ras aae

baat hi ham-nafas kuchh aisi thi

ja ke mahfil se hum jo lauT aae

us nasheman ki shan kya hogi

barq rah rah ke jis pe lahrae

raushni ka nishan nahin milta

har taraf zulmaton ke hain sae

tera dar chhoD kar ai jaan-e-wafa

koi jae to phir kahan jae

ya-KHuda umr ho daraaz us ki

dushmani ki jo aag bhaDkae

KHwab mein un ke aastane par

sajda-e-shauq hum guzar aae

jaane kya ho gaya mujhe 'anjum'

aankh bhar aai jab wo yaad aae