dard-e-gham-e-firaq se aankhen hain ashk-bar kya

dard-e-ġham-e-firāq se āñkheñ haiñ ashk-bār kyā

rone se hogī muḳhtasar zahmat-e-intizār kyā

zaḳhmoñ se chuur jo na ho sīna-e-dāġh-dār kyā

jis meñ na ho hujūm-e-gul kahiye use bahār kyā

jis ne jalā ke dil mirā hijr kī shab miTā diyā

sham.eñ jalāne aayā hai ab vo sar-e-mazār kyā

uTh ga.ī jis taraf nazar hashr sā ik bapā huā

un kī nigāh-e-nāz hai fitna-e-rozgār kyā

miT ke bhī us kī justujū hai jo jahāñ meñ chār-sū

legā kisī jagah qarār uḌtā huā ġhubār kyā

ho chukī ḳhatm shām-e-ġham āñkhoñ meñ aa chukā hai dam

ab bhī marīz-e-hijr ko un kā hai intizār kyā

jurm-e-vafā se andalīb-e-gul kī nazar meñ thī zalīl

kāñToñ ke bhī nigāh meñ honā paḌegā ḳhvār kyā

koshish-e-zabt laakh kī phir bhī na ashk tham sake

jabr na dil pe ho sakā aisā bhī iḳhtiyār kyā

un kī nazar ke saath hī saarā zamāna phir gayā

gardish-e-chashm-e-nāz hai gardish-e-rozgār kyā

bād-e-ḳhizāñ kī mauj thī ġhuncha-e-dil ke haq meñ sam

mausam-e-gul kī bhī havā hogī na sāzgār kyā

'sho.ala' tafta-dil mujhe ātish-e-ishq se hai kaam

merī nazar meñ tuur kī barq-e-sharāra-bār kyā

dard-e-gham-e-firaq se aankhen hain ashk-bar kya

rone se hogi muKHtasar zahmat-e-intizar kya

zaKHmon se chur jo na ho sina-e-dagh-dar kya

jis mein na ho hujum-e-gul kahiye use bahaar kya

jis ne jala ke dil mera hijr ki shab miTa diya

shamen jalane aaya hai ab wo sar-e-mazar kya

uTh gai jis taraf nazar hashr sa ek bapa hua

un ki nigah-e-naz hai fitna-e-rozgar kya

miT ke bhi us ki justuju hai jo jahan mein chaar-su

lega kisi jagah qarar uDta hua ghubar kya

ho chuki KHatm sham-e-gham aankhon mein aa chuka hai dam

ab bhi mariz-e-hijr ko un ka hai intizar kya

jurm-e-wafa se andalib-e-gul ki nazar mein thi zalil

kanTon ke bhi nigah mein hona paDega KHwar kya

koshish-e-zabt lakh ki phir bhi na ashk tham sake

jabr na dil pe ho saka aisa bhi iKHtiyar kya

un ki nazar ke sath hi sara zamana phir gaya

gardish-e-chashm-e-naz hai gardish-e-rozgar kya

baad-e-KHizan ki mauj thi ghuncha-e-dil ke haq mein sam

mausam-e-gul ki bhi hawa hogi na sazgar kya

'shoala' tafta-dil mujhe aatish-e-ishq se hai kaam

meri nazar mein tur ki barq-e-sharara-bar kya