dard-e-tanhai alag hai shadmani hai alag

dard-e-tanhā.ī alag hai shādmānī hai alag

merā qissa aur hai un kī kahānī hai alag

ek hai mausam ḳhizāñ kā ek hai fasl-e-bahār

daur-e-pīrī hai alag ahd-e-javānī hai alag

jām-e-sahbā meñ kahāñ aisā maza hai sāqiyā

terī āñkhoñ kī sharāb-e-arġhavānī hai alag

hashr meñ pesh-e-ḳhudā khulte haiñ sab aib-o-hunar

duudh kā duudh aur hai paanī kā paanī hai alag

vo hai maidān-e-jazā ye āzmā.ish kī jagah

dār-e-uqbā aur hai duniyā-e-fānī hai alag

hukm kā sikka chalānā mulk meñ hai aur baat

mulk vāloñ ke diloñ par hukmrānī hai alag

dard-e-tanhai alag hai shadmani hai alag

mera qissa aur hai un ki kahani hai alag

ek hai mausam KHizan ka ek hai fasl-e-bahaar

daur-e-piri hai alag ahd-e-jawani hai alag

jam-e-sahba mein kahan aisa maza hai saqiya

teri aankhon ki sharab-e-arghawani hai alag

hashr mein pesh-e-KHuda khulte hain sab aib-o-hunar

dudh ka dudh aur hai pani ka pani hai alag

wo hai maidan-e-jaza ye aazmaish ki jagah

dar-e-uqba aur hai duniya-e-fani hai alag

hukm ka sikka chalana mulk mein hai aur baat

mulk walon ke dilon par hukmrani hai alag