dard ghaTta bhi nahin hai ki fana ho jae

dard ghaTtā bhī nahīñ hai ki fanā ho jaa.e

aur baḌhtā bhī nahīñ hai ki davā ho jaa.e

hai mujhe 'ilm ki ye ḳhvāb hai par ḳhvāb meñ hī

mere allāh use mujh se vafā ho jaa.e

us kā ehsān hī itnā hai merī sāñsoñ par

ġhair-mumkin hai ki sāñsoñ se adā ho jaa.e

vo kisī roz kare tark-e-ta'alluq ḳhud se

aur usī din se mirā sirf mirā ho jaa.e

laakh achchhā ho to merā jo nahīñ ḳhaak achchhā

is se achchhā hai ki tū sach meñ burā ho jaa.e

vaqt ko kar de qalam ḳhud ko siyāhī kar de

terā sochā huā qismat kā likhā ho jaa.e

mujh ko mā'lūm hai vo shaḳhs merā hai lekin

hai ye lāzim ki ab us ko bhī patā ho jaa.e

dard ghaTta bhi nahin hai ki fana ho jae

aur baDhta bhi nahin hai ki dawa ho jae

hai mujhe 'ilm ki ye KHwab hai par KHwab mein hi

mere allah use mujh se wafa ho jae

us ka ehsan hi itna hai meri sanson par

ghair-mumkin hai ki sanson se ada ho jae

wo kisi roz kare tark-e-ta'alluq KHud se

aur usi din se mera sirf mera ho jae

lakh achchha ho to mera jo nahin KHak achchha

is se achchha hai ki tu sach mein bura ho jae

waqt ko kar de qalam KHud ko siyahi kar de

tera socha hua qismat ka likha ho jae

mujh ko ma'lum hai wo shaKHs mera hai lekin

hai ye lazim ki ab us ko bhi pata ho jae