dard had se siwa diya tu ne

dard had se sivā diyā tū ne

merā rutba baḌhā diyā tū ne

dard-o-ġham hī sahī ḳhushī na sahī

mujh ko jo kuchh diyā diyā tū ne

rāhat-afzā lagā mujhe har ġham

dard aisā jagā diyā tū ne

naam de kar ġham-e-mohabbat kā

kyuuñ fasāna banā diyā tū ne

dil meñ aayā to is tarah aayā

dil se sab kuchh bhulā diyā tū ne

jis kī hasrat kalīm rakhte the

mujh ko vo bhī dikhā diyā tū ne

jugnuoñ hī pe thī nazar merī

mujh ko sūraj banā diyā tū ne

dard had se siwa diya tu ne

mera rutba baDha diya tu ne

dard-o-gham hi sahi KHushi na sahi

mujh ko jo kuchh diya diya tu ne

rahat-afza laga mujhe har gham

dard aisa jaga diya tu ne

nam de kar gham-e-mohabbat ka

kyun fasana bana diya tu ne

dil mein aaya to is tarah aaya

dil se sab kuchh bhula diya tu ne

jis ki hasrat kalim rakhte the

mujh ko wo bhi dikha diya tu ne

jugnuon hi pe thi nazar meri

mujh ko suraj bana diya tu ne