dard hote hain kai dil mein chhupane ke liye

dard hote haiñ ka.ī dil meñ chhupāne ke liye

sab ke sab aañsū nahīñ hote bahāne ke liye

umr tanhā kaaT dī va.ada nibhāne ke liye

ahd bāñdhā thā kisī ne āzmāne ke liye

ye qafas hai ghar kī zebā.ish baḌhāne ke liye

ye parinde to nahīñ haiñ āshiyāne ke liye

kuchh diye dīvār par rakhne haiñ vaqt-e-intizār

kuchh diye laayā huuñ palkoñ par jalāne ke liye

vo ba-zāhir to milā thā ek lamhe ko 'adīm'

umr saarī chāhiye us ko bhulāne ke liye

log zer-e-ḳhāk bhī to Duub jaate haiñ 'adīm'

ik samundar hī nahīñ hai Duub jaane ke liye

tū pas-e-ḳhanda-labī aahoñ kī āvāzeñ to sun

ye hañsī to aa.ī hai aañsū chhupāne ke liye

koī ġham ho koī dukh ho dard koī ho 'adīm'

muskurānā paḌ hī jaatā hai zamāne ke liye

dard hote hain kai dil mein chhupane ke liye

sab ke sab aansu nahin hote bahane ke liye

umr tanha kaT di wada nibhane ke liye

ahd bandha tha kisi ne aazmane ke liye

ye qafas hai ghar ki zebaish baDhane ke liye

ye parinde to nahin hain aashiyane ke liye

kuchh diye diwar par rakhne hain waqt-e-intizar

kuchh diye laya hun palkon par jalane ke liye

wo ba-zahir to mila tha ek lamhe ko 'adim'

umr sari chahiye us ko bhulane ke liye

log zer-e-KHak bhi to Dub jate hain 'adim'

ek samundar hi nahin hai Dub jaane ke liye

tu pas-e-KHanda-labi aahon ki aawazen to sun

ye hansi to aai hai aansu chhupane ke liye

koi gham ho koi dukh ho dard koi ho 'adim'

muskurana paD hi jata hai zamane ke liye