dard jitne hain wahi bais-e-darman honge

dard jitne haiñ vahī bā.is-e-darmāñ hoñge

chārāgar tere na sharminda-e-ehsāñ hoñge

dekhnā gesū-e-jānāñ bhī pareshāñ hoñge

mausam-e-gul meñ jo ham chāk-garebāñ hoñge

yuuñ tire ishq meñ ham be-sar-o-sāmāñ hoñge

apnī hastī ke tasavvur se gurezāñ hoñge

dāstāñ ġhair kī rangīn banāne vaale

dekhnā mere fasāne ke bhī unvāñ hoñge

na rahegā rah-e-ulfat meñ ḳhudī kā ehsās

talab-e-husn meñ jab be-sar-o-sāmāñ hoñge

hasrat-o-yās ke maare haiñ sabhī to ġhunche

bāġhbāñ ab na chaman meñ gul-e-ḳhandāñ hoñge

yahī ġhamze yahī va.ade yahī andāz-e-vafā

yahī ik roz mirī maut ke sāmāñ hoñge

aaj hañste haiñ jo dīvāngī-e-dil pe mirī

ek din ḳhud bhī vo angusht-ba-dandāñ hoñge

raat jo bazm-e-ḳharābāt meñ mad.hosh hue

mohtasib ham ko yaqīñ hai vo musalmāñ hoñge

shauq-e-takmīl-e-junūñ mujh ko liye jaatā hai

hoñge ab zer-e-qadam jitne bayābāñ hoñge

phir vahī vahshat-e-dil josh meñ aa.ī 'aslam'

phir mire mūnis-o-ġham-ḳhvār pareshāñ hoñge

dard jitne hain wahi bais-e-darman honge

chaaragar tere na sharminda-e-ehsan honge

dekhna gesu-e-jaanan bhi pareshan honge

mausam-e-gul mein jo hum chaak-gareban honge

yun tere ishq mein hum be-sar-o-saman honge

apni hasti ke tasawwur se gurezan honge

dastan ghair ki rangin banane wale

dekhna mere fasane ke bhi unwan honge

na rahega rah-e-ulfat mein KHudi ka ehsas

talab-e-husn mein jab be-sar-o-saman honge

hasrat-o-yas ke mare hain sabhi to ghunche

baghban ab na chaman mein gul-e-KHandan honge

yahi ghamze yahi wade yahi andaz-e-wafa

yahi ek roz meri maut ke saman honge

aaj hanste hain jo diwangi-e-dil pe meri

ek din KHud bhi wo angusht-ba-dandan honge

raat jo bazm-e-KHarabaat mein madhosh hue

mohtasib hum ko yaqin hai wo musalman honge

shauq-e-takmil-e-junun mujh ko liye jata hai

honge ab zer-e-qadam jitne bayaban honge

phir wahi wahshat-e-dil josh mein aai 'aslam'

phir mere munis-o-gham-KHwar pareshan honge