dard ka samundar hai sirf par hone tak

dard kā samundar hai sirf paar hone tak

ishq kī haqīqat ke āshkār hone tak

roz-o-shab kī gardish meñ mahv-e-raqs rahte haiñ

ḳhaak ke bagūle haiñ bas ġhubār hone tak

ḳhvāhishoñ kī ḳhushbū meñ ḳhvāb ḳhvāb phirte the

pālkī meñ tāroñ kī ham savār hone tak

qurbatoñ ke jañgal meñ der kitnī lagtī hai

pairahan mohabbat kā taar taar hone tak

soch kī havelī meñ ik sukūt taarī thā

muntazir nigāhoñ ke be-qarār hone tak

ātish-e-ġham-e-dil meñ ḳhaak ho ga.e ham to

rishta-e-mohabbat ke ustuvār hone tak

zindagī ke lahje ko ek umr lagtī hai

dhuup kī tamāzat se sāya-dār hone tak

ajnabī musāfir the ham-safar rahe phir bhī

ik gurez haa.il thā e'tibār hone tak

pāniyoñ ke siine par aaj bhī safīne haiñ

sar-phirī havāoñ ke sāzgār hone tak

kitnī maujeñ Dūbeñ-gī sāhiloñ ke dāman meñ

qurbatoñ kī koshish meñ rāz-dār hone tak

thā kamāl-e-kūza-gar Dhāltā rahā mujh ko

haañ 'farah' lage barsoñ shāh-kār hone tak

dard ka samundar hai sirf par hone tak

ishq ki haqiqat ke aashkar hone tak

roz-o-shab ki gardish mein mahw-e-raqs rahte hain

KHak ke bagule hain bas ghubar hone tak

KHwahishon ki KHushbu mein KHwab KHwab phirte the

palki mein taron ki hum sawar hone tak

qurbaton ke jangal mein der kitni lagti hai

pairahan mohabbat ka tar tar hone tak

soch ki haweli mein ek sukut tari tha

muntazir nigahon ke be-qarar hone tak

aatish-e-gham-e-dil mein KHak ho gae hum to

rishta-e-mohabbat ke ustuwar hone tak

zindagi ke lahje ko ek umr lagti hai

dhup ki tamazat se saya-dar hone tak

ajnabi musafir the ham-safar rahe phir bhi

ek gurez hail tha e'tibar hone tak

paniyon ke sine par aaj bhi safine hain

sar-phiri hawaon ke sazgar hone tak

kitni maujen Duben-gi sahilon ke daman mein

qurbaton ki koshish mein raaz-dar hone tak

tha kamal-e-kuza-gar Dhaalta raha mujh ko

han 'farah' lage barson shah-kar hone tak