dard ki dhup mein aa baiThen to jaana hi na ho

dard kī dhuup meñ aa baiTheñ to jaanā hī na ho

jo bhī mausam ho ye malbūs purānā hī na ho

ye diyā dast-e-du'ā hī kā na ho paimāna

ye sitāra mirī tasbīh kā daana hī na ho

yuuñ na ho ḳhema-gah-e-ḳhvāb bulātī rah jaa.e

aur is ḳheme meñ apnā kabhī aanā hī na ho

apnī āñkhoñ kī 'amal-dārī meñ rahne de mujhe

ye Thikāna mire hone kā bahāna hī na ho

qaid uThā kar bhī kabhī tāq-e-talab dekhiyegā

in charāġhoñ ko ye ghar chhoḌ ke jaanā hī na ho

ruḳhsat-e-dost kī sā'at bhī hai taslīm magar

isī sā'at meñ mirā saarā zamāna hī na ho

parda is dil pe paḌā rahne do ḳhāmoshī kā

ye kahīñ apnī haqīqat meñ fasāna hī na ho

dard ki dhup mein aa baiThen to jaana hi na ho

jo bhi mausam ho ye malbus purana hi na ho

ye diya dast-e-du'a hi ka na ho paimana

ye sitara meri tasbih ka dana hi na ho

yun na ho KHema-gah-e-KHwab bulati rah jae

aur is KHeme mein apna kabhi aana hi na ho

apni aankhon ki 'amal-dari mein rahne de mujhe

ye Thikana mere hone ka bahana hi na ho

qaid uTha kar bhi kabhi taq-e-talab dekhiyega

in charaghon ko ye ghar chhoD ke jaana hi na ho

ruKHsat-e-dost ki sa'at bhi hai taslim magar

isi sa'at mein mera sara zamana hi na ho

parda is dil pe paDa rahne do KHamoshi ka

ye kahin apni haqiqat mein fasana hi na ho