dard ki lahar yaqinan mere ghar jaegi

dard kī lahar yaqīnan mire ghar jā.egī

maiñ na hūñgā to ḳhudā jaane kidhar jā.egī

mauja-e-ḳhūñ se guzarnā hai guzar jā.egī

chār-din ba.ad ye naddī bhī utar jā.egī

kaun kar saktā hai afkār-o-nazar ko mahsūr

kaam ḳhushbū kā bikharnā hai bikhar jā.egī

manzil-e-zīst tujhe maiñ na karūñgā māyūs

maiñ na pahuñchā to mirī gard-e-safar jā.egī

maiñ añdheroñ ke tasalsul se nahīñ huuñ ḳhā.if

raushnī aaj nahīñ kal mire ghar jā.egī

maiñ to mar saktā huuñ hālāt ke sannāToñ meñ

dosto kyā mirī āvāz bhī mar jā.egī

dard ki lahar yaqinan mere ghar jaegi

main na hunga to KHuda jaane kidhar jaegi

mauja-e-KHun se guzarna hai guzar jaegi

chaar-din baad ye naddi bhi utar jaegi

kaun kar sakta hai afkar-o-nazar ko mahsur

kaam KHushbu ka bikharna hai bikhar jaegi

manzil-e-zist tujhe main na karunga mayus

main na pahuncha to meri gard-e-safar jaegi

main andheron ke tasalsul se nahin hun KHaif

raushni aaj nahin kal mere ghar jaegi

main to mar sakta hun haalat ke sannaTon mein

dosto kya meri aawaz bhi mar jaegi