dard ki lai ko baDha do ki main zinda hun abhi

dard kī lai ko baḌhā do ki maiñ zinda huuñ abhī

aur is dil ko dukhā do ki maiñ zinda huuñ abhī

mere ehsās kī ye baaḌh to rukne se rahī

mujh ko dīvāna banā do ki maiñ zinda huuñ abhī

karb-e-tanhā.ī kā nashtar rag-e-jāñ meñ rakh do

mujh ko ehsās dilā do ki maiñ zinda huuñ abhī

hausla jiine kā hotā hai par itnā bhī nahīñ

mujh ko is kī bhī sazā do ki maiñ zinda huuñ abhī

aarzū ek alamnāk kahānī hī sahī

phir se ik baar sunā do ki maiñ zinda huuñ abhī

saaya ban kar maiñ salīboñ se utar aayā huuñ

ab koī aur sazā do ki maiñ zinda huuñ abhī

jū-e-ḳhūñ āñkhoñ se bahtī hī rahegī 'tanvīr'

āḳhirī sham.a bujhā do ki maiñ zinda huuñ abhī

dard ki lai ko baDha do ki main zinda hun abhi

aur is dil ko dukha do ki main zinda hun abhi

mere ehsas ki ye baDh to rukne se rahi

mujh ko diwana bana do ki main zinda hun abhi

karb-e-tanhai ka nashtar rag-e-jaan mein rakh do

mujh ko ehsas dila do ki main zinda hun abhi

hausla jine ka hota hai par itna bhi nahin

mujh ko is ki bhi saza do ki main zinda hun abhi

aarzu ek alamnak kahani hi sahi

phir se ek bar suna do ki main zinda hun abhi

saya ban kar main salibon se utar aaya hun

ab koi aur saza do ki main zinda hun abhi

ju-e-KHun aankhon se bahti hi rahegi 'tanwir'

aaKHiri shama bujha do ki main zinda hun abhi