dard ki nili ragen tah se ubhar aati hain

dard kī niilī rageñ tah se ubhar aatī haiñ

yaad ke zaḳhm meñ chingāriyāñ dar aatī haiñ

roz parchhā.iyāñ yādoñ kī parinde ban kar

ghar ke pichhvāḌe ke pīpal pe utar aatī haiñ

sūrateñ bantī haiñ chāhat kī ye kis miTTī se

bārhā miT ke bhī ye bār-e-digar aatī haiñ

uude uude se safūre kī ghanī Tahniyoñ se

yaad kī surma.ī kirneñ sī guzar aatī haiñ

roz khiḌkī se qarīb aam ke us peḌ ke paas

tūtiyāñ choñch meñ le le ke sahar aatī haiñ

ik virāsat kī tarah gaañv kī guḌ sī bāteñ

gaThḌiyāñ bāñdh ke is dil ke nagar aatī haiñ

jitnā bhī chāhūñ dar-e-yār se bach kar niklūñ

tohmateñ itnī ziyāda mire sar aatī haiñ

itnī sī baat pe achchhī nahīñ shorīda-sarī

shaam ko chiḌiyāñ to sab apne hī ghar aatī haiñ

sharm se uljhe dupaTTe kī jo kholūñ girheñ

dil kī 'naināñ' rageñ sab khultī nazar aatī haiñ

dard ki nili ragen tah se ubhar aati hain

yaad ke zaKHm mein chingariyan dar aati hain

roz parchhaiyan yaadon ki parinde ban kar

ghar ke pichhwaDe ke pipal pe utar aati hain

suraten banti hain chahat ki ye kis miTTi se

barha miT ke bhi ye bar-e-digar aati hain

ude ude se safure ki ghani Tahniyon se

yaad ki surmai kirnen si guzar aati hain

roz khiDki se qarib aam ke us peD ke pas

tutiyan chonch mein le le ke sahar aati hain

ek wirasat ki tarah ganw ki guD si baaten

gaThDiyan bandh ke is dil ke nagar aati hain

jitna bhi chahun dar-e-yar se bach kar niklun

tohmaten itni ziyaada mere sar aati hain

itni si baat pe achchhi nahin shorida-sari

sham ko chiDiyan to sab apne hi ghar aati hain

sharm se uljhe dupaTTe ki jo kholun girhen

dil ki 'nainan' ragen sab khulti nazar aati hain