dard ko dard kaho dard ke qabil ho jao

dard ko dard kaho dard ke qābil ho jaao

aisā bhī kyā hai ki ḳhud dil hī se ġhāfil ho jaao

tum ko tūfān se laḌnā jo nahīñ hai manzūr

phir to behtar hai ki kashtī nahīñ sāhil ho jaao

imtihāñ ishq meñ honā hai to hogā vo zarūr

aag ke khel meñ pahle hī se shāmil ho jaao

is se pahle ki kisī aur kā maiñ ho jā.ūñ

maiñ tumheñ zahr duuñ aur tum mire qātil ho jaao

lau charāġhoñ kī baḌhāne se nahīñ kuchh hāsil

nuur ban ke shab-e-zulmāt pe nāzil ho jaao

saikḌoñ tajrabe be-kār kiyā karte ho

ho mire dard meñ shāmil to mirā dil ho jaao

shor barpā hai ki nikle ho talāsh-e-ġham meñ

maḳhzan-e-ġham hai mirā dil yahīñ dāḳhil ho jaao

ahmaqoñ se jo kabhī vāsta paḌ jaa.e 'sadaf'

baat karne se kahīñ achchhā hai jāhil ho jaao

dard ko dard kaho dard ke qabil ho jao

aisa bhi kya hai ki KHud dil hi se ghafil ho jao

tum ko tufan se laDna jo nahin hai manzur

phir to behtar hai ki kashti nahin sahil ho jao

imtihan ishq mein hona hai to hoga wo zarur

aag ke khel mein pahle hi se shamil ho jao

is se pahle ki kisi aur ka main ho jaun

main tumhein zahr dun aur tum mere qatil ho jao

lau charaghon ki baDhane se nahin kuchh hasil

nur ban ke shab-e-zulmat pe nazil ho jao

saikDon tajrabe be-kar kiya karte ho

ho mere dard mein shamil to mera dil ho jao

shor barpa hai ki nikle ho talash-e-gham mein

maKHzan-e-gham hai mera dil yahin daKHil ho jao

ahmaqon se jo kabhi wasta paD jae 'sadaf'

baat karne se kahin achchha hai jahil ho jao