dard ko zabt ki sarhad se guzar jaane do

dard ko zabt kī sarhad se guzar jaane do

ab sameTo na hameñ aur bikhar jaane do

ham se hogā na kabhī apnī ḳhudī kā saudā

ham agar dil se utarte haiñ utar jaane do

tum ta.ayyun na karo apnī hadoñ kā hargiz

jab bhī jaise bhī jahāñ jaa.e nazar jaane do

itnā kaafī hai ki vo saath nahīñ hai mere

kyuuñ huā kaise huā chaak jigar jaane do

dil jalāo ki taḳhayyul kā jahāñ raushan ho

tīrgī ḳhatm karo raat sañvar jaane do

ishq saanī hai to phir us meñ shikāyat kaisī

ham na kahte the ki ik zaḳhm hai bhar jaane do

yaar ma.amūl pe lauT ā.eñge kuchh sabr karo

us fusūñ-gar kī nigāhoñ kā asar jaane do

shart jiinā hai bhaTaknā to bahāna hai faqat

vo jidhar jaatā hai har shām-o-sahar jaane do

maiñ ne rokā thā use is kā havāla de kar

ruuTh kar phir bhī vo jaatā hai agar jaane do

ḳhush-gumāñ hai vo bahut jiit pe apnī 'zākir'

ham bhī chal sakte the ik chaal magar jaane do

dard ko zabt ki sarhad se guzar jaane do

ab sameTo na hamein aur bikhar jaane do

hum se hoga na kabhi apni KHudi ka sauda

hum agar dil se utarte hain utar jaane do

tum tayyun na karo apni hadon ka hargiz

jab bhi jaise bhi jahan jae nazar jaane do

itna kafi hai ki wo sath nahin hai mere

kyun hua kaise hua chaak jigar jaane do

dil jalao ki taKHayyul ka jahan raushan ho

tirgi KHatm karo raat sanwar jaane do

ishq sani hai to phir us mein shikayat kaisi

hum na kahte the ki ek zaKHm hai bhar jaane do

yar mamul pe lauT aaenge kuchh sabr karo

us fusun-gar ki nigahon ka asar jaane do

shart jina hai bhaTakna to bahana hai faqat

wo jidhar jata hai har sham-o-sahar jaane do

main ne roka tha use is ka hawala de kar

ruTh kar phir bhi wo jata hai agar jaane do

KHush-guman hai wo bahut jit pe apni 'zakir'

hum bhi chal sakte the ek chaal magar jaane do