dard-o-alam ke naghmat ko gane se mili

dard-o-ālām ke naġhmāt ko gaane se milī

kuchh to rāhat tujhe ash.ār sunāne se milī

maiñ to har haal meñ huuñ terī vafā kā tālib

kitnī rāhat tujhe dil merā dukhāne se milī

raah tārīk hai manzil kā nishāñ hai mādūm

raushnī dil ke charāġhoñ ko jalāne se milī

ham ne jazbāt ko qaabū meñ hamesha rakkhā

kuchh aziyyat hameñ rishtoñ ko nibhāne se milī

kyoñ na barbādī-e-gulshan pe bahā.ūñ aañsū

jis ko shādābī lahū dil kā jalāne se milī

maiñ jise DhūñDhtā rahtā huuñ galī kūchoñ meñ

us kī tasvīr mire ġham ke fasāne se milī

ik zarā ma.arifat-e-haq kī tajallī 'ajmal'

sar-e-taslīm ba-sad-shauq jhukāne se milī

dard-o-alam ke naghmat ko gane se mili

kuchh to rahat tujhe ashaar sunane se mili

main to har haal mein hun teri wafa ka talib

kitni rahat tujhe dil mera dukhane se mili

rah tarik hai manzil ka nishan hai madum

raushni dil ke charaghon ko jalane se mili

hum ne jazbaat ko qabu mein hamesha rakkha

kuchh aziyyat hamein rishton ko nibhane se mili

kyon na barbaadi-e-gulshan pe bahaun aansu

jis ko shadabi lahu dil ka jalane se mili

main jise DhunDhta rahta hun gali kuchon mein

us ki taswir mere gham ke fasane se mili

ek zara marifat-e-haq ki tajalli 'ajmal'

sar-e-taslim ba-sad-shauq jhukane se mili