درد و غم کی قید سے راہ مفر کوئی نہیں

درد و غم کی قید سے راہ مفر کوئی نہیں

یہ وہ گھر ہے جس کی دیواروں میں در کوئی نہیں

راستے مسدود ہوتے جا رہے ہیں بھیڑ سے

آؤ اس جانب ہی چلتے ہیں جدھر کوئی نہیں

قتل چوری آبرو ریزی خسارے کا بجٹ

آج کے اخبار میں اچھی خبر کوئی نہیں

مسئلوں کی مار سے چہرے ہیں مرجھائے ہوئے

ایسا لگتا ہے جہاں میں بے ضرر کوئی نہیں

اس قدر فرقہ پرستی ہر گلی ہر موڑ پر

نفرتوں کے شہر میں محفوظ گھر کوئی نہیں

پوچھتی ہیں زرد آنکھیں مفلسی کی اوٹ سے

کیا سنہرے خواب کا اب نقش گر کوئی نہیں

توڑ کر رشتوں کے بندھن چھوڑ جاتے ہیں سبھی

ساتھ دیتا ہے شرافتؔ عمر بھر کوئی نہیں