dard-o-gham ko hasti-e-kam-maya ka hasil samajh

dard-o-ġham ko hastī-e-kam-māya kā hāsil samajh

dars-gāh-e-ishq kī ye ramz ai ġhāfil samajh

justujū-dar-justujū āsān har mushkil samajh

ġham na kar tadbīr ko taqdīr kā hāsil samajh

bhuul kar bhī koī harf-e-dil-shikan lab par na lā

haq to ye hai dūsre ke dil ko apnā dil samajh

rāh-e-ulfat meñ jise gum-gashtagī hāsil huī

aise ḳhush-taqdīr ko āsūda-e-manzil samajh

lazzat-e-lutf-o-tarab ġham-āshnā rahne meñ hai

jaan ko har haal meñ āzār ke qābil samajh

pā-e-istiqlāl meñ laġhzish na aa jaa.e kahīñ

azm-e-rāsiḳh hī ko apnā rahbar-e-kāmil samajh

ahd-e-māzī ko na ro taqdīr kā mātam na kar

haal kī rūdād hī ko apnā mustaqbil samajh

bāryābī hosh kī baazī lagā dene meñ hai

bārgāh-e-husn meñ hushiyār ko ġhāfil samajh

nāḳhudā to kyā ḳhudā kā bhī sahārā chhoḌ de

qulzum-e-hastī meñ har girdāb ko sāhil samajh

ab zamāna bār-e-ehsāñ sar pe lene kā nahīñ

ruḳh zamāne kī havā kā dekh ai ġhāfil samajh

bāġh-e-ālam kī bahāreñ sab ḳhizāñ-anjām haiñ

aish-sāmānī ko vaj.h-e-ḳhastagī-e-dil samajh

yā tarīq-e-dost-dārī par bharosa hī na kar

yā fareb-e-dostī ke sehr ko bātil samajh

imtiyāz-e-jalva-o-parda jahāñ rahtā nahīñ

vo maqām aa.e to zauq-e-dīd ko kāmil samajh

kyuuñ kisī begāna-vash par dil fidā kartā hai tū

ai 'rishī' kuchh hosh meñ aa apne dil ko dil samajh

dard-o-gham ko hasti-e-kam-maya ka hasil samajh

dars-gah-e-ishq ki ye ramz ai ghafil samajh

justuju-dar-justuju aasan har mushkil samajh

gham na kar tadbir ko taqdir ka hasil samajh

bhul kar bhi koi harf-e-dil-shikan lab par na la

haq to ye hai dusre ke dil ko apna dil samajh

rah-e-ulfat mein jise gum-gashtagi hasil hui

aise KHush-taqdir ko aasuda-e-manzil samajh

lazzat-e-lutf-o-tarab gham-ashna rahne mein hai

jaan ko har haal mein aazar ke qabil samajh

pa-e-istiqlal mein laghzish na aa jae kahin

azm-e-rasiKH hi ko apna rahbar-e-kaamil samajh

ahd-e-mazi ko na ro taqdir ka matam na kar

haal ki rudad hi ko apna mustaqbil samajh

baryabi hosh ki bazi laga dene mein hai

bargah-e-husn mein hushiyar ko ghafil samajh

naKHuda to kya KHuda ka bhi sahaara chhoD de

qulzum-e-hasti mein har girdab ko sahil samajh

ab zamana bar-e-ehsan sar pe lene ka nahin

ruKH zamane ki hawa ka dekh ai ghafil samajh

bagh-e-alam ki bahaaren sab KHizan-anjam hain

aish-samani ko wajh-e-KHastagi-e-dil samajh

ya tariq-e-dost-dari par bharosa hi na kar

ya fareb-e-dosti ke sehr ko baatil samajh

imtiyaz-e-jalwa-o-parda jahan rahta nahin

wo maqam aae to zauq-e-did ko kaamil samajh

kyun kisi begana-wash par dil fida karta hai tu

ai 'rishi' kuchh hosh mein aa apne dil ko dil samajh