dard-o-gham zamane ke aur ek ji tanha

dard-o-ġham zamāne ke aur ek jī tanhā

āñdhiyoñ meñ jaltī hai sham-e-zindagī tanhā

apnī apnī rāheñ haiñ apnī apnī manzil hai

kār-gāh-e-hastī meñ rahte haiñ sabhī tanhā

shab se dāġh-e-hijrāñ kā vāsta ajab shai hai

terī dilkashī tanhā merī bekalī tanhā

haa.e us zamāne meñ ahl-e-fan kī be-qadrī

mausam-e-zamistāñ meñ jaise chāñdnī tanhā

jaane dil kī dhaḌkan meñ kyā fareb hotā hai

tujh se baat karte haiñ ham kabhī kabhī tanhā

rahguzar pe sajtī hai apnī bazm-e-tanhā.ī

terī naqsh-e-pā tanhā merī be-ḳhudī tanhā

husn-o-ishq kī taqdīr ik tazād bāham hai

un kī shaam bhī mahfil apnī sub.h bhī tanhā

kaun kis kī suntā hai aise daur meñ 'ḳhāvar'

ham ne duur chheḌī hai ġham kī rāgnī tanhā

dard-o-gham zamane ke aur ek ji tanha

aandhiyon mein jalti hai sham-e-zindagi tanha

apni apni rahen hain apni apni manzil hai

kar-gah-e-hasti mein rahte hain sabhi tanha

shab se dagh-e-hijran ka wasta ajab shai hai

teri dilkashi tanha meri bekali tanha

hae us zamane mein ahl-e-fan ki be-qadri

mausam-e-zamistan mein jaise chandni tanha

jaane dil ki dhaDkan mein kya fareb hota hai

tujh se baat karte hain hum kabhi kabhi tanha

rahguzar pe sajti hai apni bazm-e-tanhai

teri naqsh-e-pa tanha meri be-KHudi tanha

husn-o-ishq ki taqdir ek tazad baham hai

un ki sham bhi mahfil apni subh bhi tanha

kaun kis ki sunta hai aise daur mein 'KHawar'

hum ne dur chheDi hai gham ki ragni tanha