dard-o-kaif ka sangam der tak nahin rahta

dard-o-kaif kā sañgam der tak nahīñ rahtā

ye surūr kā aalam der tak nahīñ rahtā

fasl-e-gul hai hāsil gar zindagī ke gulshan kī

kyoñ bahār kā mausam der tak nahīñ rahtā

rañg is jahāñ ke sab naqsh-e-āb haiñ goyā

koī rut koī mausam der tak nahīñ rahtā

hai jo shāḳh-e-nāzuk par āñdhiyoñ ke raste meñ

aisā āshiyāñ qaa.em der tak nahīñ rahtā

bebasī meñ Dhal jaa.e jab bhī rañg-e-māyūsī

intizār kā aalam der tak nahīñ rahtā

dard kī kasak dil se muddatoñ nahīñ jaatī

āñsuoñ se dāman nam der tak nahīñ rahtā

dard-o-kaif ka sangam der tak nahin rahta

ye surur ka aalam der tak nahin rahta

fasl-e-gul hai hasil gar zindagi ke gulshan ki

kyon bahaar ka mausam der tak nahin rahta

rang is jahan ke sab naqsh-e-ab hain goya

koi rut koi mausam der tak nahin rahta

hai jo shaKH-e-nazuk par aandhiyon ke raste mein

aisa aashiyan qaem der tak nahin rahta

bebasi mein Dhal jae jab bhi rang-e-mayusi

intizar ka aalam der tak nahin rahta

dard ki kasak dil se muddaton nahin jati

aansuon se daman nam der tak nahin rahta