dard sahne ki baat karta hai

dard sahne kī baat kartā hai

vo mujhe āshnā-e-zāt kartā hai

bosa detā hai mere hāthoñ ko

maut ko yuuñ hayāt kartā hai

sāmne baiTh kar jo boltā hai

sirf apnī hī baat kartā hai

pūchhtī huuñ maiñ apne aap se ye

kaise din ko vo raat kartā hai

us kī muTThī meñ band saañs merī

vus.at-e-kā.enāt kartā hai

kāsa-e-chashm us kā bhartā nahīñ

yuuñ to zikr-e-najāt kartā hai

jab bhī kartā hai ishq kī bāteñ

vāris-e-shash-jihāt kartā hai

aks kar ke mujhe vo shaḳhs 'nasīm'

rāt-din mujh se baat kartā hai

dard sahne ki baat karta hai

wo mujhe aashna-e-zat karta hai

bosa deta hai mere hathon ko

maut ko yun hayat karta hai

samne baiTh kar jo bolta hai

sirf apni hi baat karta hai

puchhti hun main apne aap se ye

kaise din ko wo raat karta hai

us ki muTThi mein band sans meri

wusat-e-kaenat karta hai

kasa-e-chashm us ka bharta nahin

yun to zikr-e-najat karta hai

jab bhi karta hai ishq ki baaten

waris-e-shash-jihat karta hai

aks kar ke mujhe wo shaKHs 'nasim'

raat-din mujh se baat karta hai