دریا ہے محافظ تو کہیں تیز ہوا ہے

دریا ہے محافظ تو کہیں تیز ہوا ہے

طوفان میں کشتی کا نگہبان خدا ہے

پتا جو ابھی ٹوٹ کے شاخوں سے گرا ہے

انسان کی ہستی کا بھرم کھول رہا ہے

شہرت ہو کہ دولت ہو کہ عزت ہو جہاں میں

جو کچھ بھی ملا ماں کی دعاؤں سے ملا ہے

جائے تو کدھر جائے یہ صحرا کا مسافر

سایہ نہ شجر ہے نہ کسی سمت ہوا ہے

کیا طرفہ تماشا ہے کہ مجھ سے مرا قاتل

خود آ کے مرے گھر کا پتہ پوچھ رہا ہے

اس دور میں کیا ڈھونڈتے ہو عدل جہانگیر

مقتول پہ بھی قتل کا الزام لگا ہے

اب پاؤں کے چھالے بھی نہیں دیتے گواہی

صحرا کے سفر میں یہ عجب وقت پڑا ہے

شاید کہ بھرم کھل گیا اس راز جنوں کا

جو آج ظفرؔ کانپتے ہونٹوں پہ دعا ہے