dariya hai muhafiz to kahin tez hawa hai

dariyā hai muhāfiz to kahīñ tez havā hai

tūfān meñ kashtī kā nigahbān ḳhudā hai

pattā jo abhī TuuT ke shāḳhoñ se girā hai

insān kī hastī kā bharam khol rahā hai

shohrat ho ki daulat ho ki izzat ho jahāñ meñ

jo kuchh bhī milā maañ kī duāoñ se milā hai

jaa.e to kidhar jaa.e ye sahrā kā musāfir

saaya na shajar hai na kisī samt havā hai

kyā turfa-tamāshā hai ki mujh se mirā qātil

ḳhud aa ke mire ghar kā pata pūchh rahā hai

is daur meñ kyā DhūñDte ho adl-e-jahāñgīr

maqtūl pe bhī qatl kā ilzām lagā hai

ab paañv ke chhāle bhī nahīñ dete gavāhī

sahrā ke safar meñ ye ajab vaqt paḌā hai

shāyad ki bharam khul gayā is rāz-e-junūñ kā

jo aaj 'zafar' kāñpte hoñToñ pe duā hai

dariya hai muhafiz to kahin tez hawa hai

tufan mein kashti ka nigahban KHuda hai

patta jo abhi TuT ke shaKHon se gira hai

insan ki hasti ka bharam khol raha hai

shohrat ho ki daulat ho ki izzat ho jahan mein

jo kuchh bhi mila man ki duaon se mila hai

jae to kidhar jae ye sahra ka musafir

saya na shajar hai na kisi samt hawa hai

kya turfa-tamasha hai ki mujh se mera qatil

KHud aa ke mere ghar ka pata puchh raha hai

is daur mein kya DhunDte ho adl-e-jahangir

maqtul pe bhi qatl ka ilzam laga hai

ab panw ke chhaale bhi nahin dete gawahi

sahra ke safar mein ye ajab waqt paDa hai

shayad ki bharam khul gaya is raaz-e-junun ka

jo aaj 'zafar' kanpte honTon pe dua hai