دریا کا ان کو ہم کوئی قطرہ نہ دے سکے

دریا کا ان کو ہم کوئی قطرہ نہ دے سکے

بس اس لیے درخت بھی سایہ نہ دے سکے

میں تو سمجھ رہا تھا مرا ساتھ دیں گے وہ

مشکل گھڑی میں بھی جو دلاسہ نہ دے سکے

اتنے دکھا دئے ہیں ہمیں زندگی نے رنگ

کہ زندگی کو ہم کوئی چہرہ نہ دے سکے

یہ بات چھوڑ دے کہ مرے پاس کچھ نہ تھا

بس یہ بتا دے تو کہ تجھے کیا نہ دے سکے

ہم چاہتے تھے دل میں رہے عمر بھر مگر

مفلس تھے اس قدر کہ کرایہ نہ دے سکے

کرتے ہیں دوسروں کا مکاں راکھ وہ چراغ

اپنے مکان میں جو اجالا نہ دے سکے

شادابؔ اک سبق تو تجھے دے گئے وہ لوگ

رستہ بتا کے جو تجھے راستہ نہ دے سکے