dariya ka un ko hum koi qatra na de sake

dariyā kā un ko ham koī qatra na de sake

bas is liye daraḳht bhī saaya na de sake

maiñ to samajh rahā thā mirā saath deñge vo

mushkil ghaḌī meñ bhī jo dilāsa na de sake

itne dikhā diye haiñ hameñ zindagī ne rang

ki zindagī ko ham koī chehra na de sake

ye baat chhoḌ de ki mire paas kuchh na thā

bas ye batā de tū ki tujhe kyā na de sake

ham chāhte the dil meñ rahe 'umr-bhar magar

muflis the is qadar ki kirāya na de sake

karte haiñ dūsroñ kā makāñ raakh vo charāġh

apne makān meñ jo ujālā na de sake

'shādāb' ik sabaq to tujhe de ga.e vo log

rasta batā ke jo tujhe rāsta na de sake

dariya ka un ko hum koi qatra na de sake

bas is liye daraKHt bhi saya na de sake

main to samajh raha tha mera sath denge wo

mushkil ghaDi mein bhi jo dilasa na de sake

itne dikha diye hain hamein zindagi ne rang

ki zindagi ko hum koi chehra na de sake

ye baat chhoD de ki mere pas kuchh na tha

bas ye bata de tu ki tujhe kya na de sake

hum chahte the dil mein rahe 'umr-bhar magar

muflis the is qadar ki kiraya na de sake

karte hain dusron ka makan rakh wo charagh

apne makan mein jo ujala na de sake

'shadab' ek sabaq to tujhe de gae wo log

rasta bata ke jo tujhe rasta na de sake